Pinaagi sa mas taas nga produksiyon ug kusog nga demand sa merkado, ang sektor sa manufacturing sa Pilipinas nakatala og pinakakusog nga pagtubo niadtong Agosto sumala sa S&P Global.
Tungod niini, ang Purchasing Managers’ Index (PMI) sa nasod misaka sa ikaupat nga sunod-sunod nga bulan ngadto sa 54.9 gikan sa 51.8 sa miaging bulan, nga maoy pinakataas nga lebel sukad pa niadtong Disyembre 2016.
Sumala ni Maryam Baluch, economist sa S&P Global Market Intelligence, ang pag-uswag resulta sa pagdaghan sa mga bag-ong order, paggawas sa mga bag-ong produkto, ug ang pagbalik sa kusog nga baligya sa gawas sa nasod (export orders) human sa unom ka bulan nga paghinay. Tungod sa maong pagtaas sa demand, gipaspasan sa mga pabrika ang pagpalit og mga hilaw nga materyales ug misugod usab sa pagpanuhol og dugang mga trabahante—diin ang pagdaghan sa trabaho sa maong sektor maoy pinakakusog sulod sa 21 ka bulan.
Bisan pa sa pagtaas sa gasto sa enerhiya, raw materials, ug logistics, gipadayag sa S&P Global nga mas hinay ug kontrolado ang pagsaka sa input costs kumpara sa milabayng mga bulan. Kini nga kalampusan nagpakita nga nakabangon na ang sektor sa manufacturing gikan sa paghinay niini sa miaging quarter nga gipahinabo sa panagbangi sa Middle East
Photo Courtesy: BusinessWorld/PNA
