Nakamonitor ang Philippine Navy ug 56 ka barko sa China Coast Guard (CCG) ug People’s Liberation Army Navy (PLAN) sa palibot sa upat ka lugar sa West Philippine Sea niadtong Agosto.
Sumala sa Armed Forces of the Philippines (AFP), apil sa ilang na-monitor ang mga barkong panggubat sa PLAN nga wala makita sa miaging semana.
Matod pa ni AFP West Philippine Sea spokesperson Rear Adm. Roy Vincent Trinidad nga mas kompleto ang hulagway sa kahimtang sa West Philippine Sea kung binulan ang pag-monitor niini kumpara sa usa lamang ka semana nga obserbasyon. Dugang pa ni Trinidad nga ang usa ka semana nga monitoring dili pa igo aron makahimo og lig-on nga pagtimbang-timbang sa presensya sa mga barko sa China.
Sumala sa AFP ang monitoring nila sa bulan sa Agosto naglakip sa Ayungin kun Second Thomas Shoal, Panatag kun Scarborough Shoal, Escoda kun Sabina Shoal, ug Pag-asa kun Thitu Island.
Nasayran nga 23 ka barko sa China ang namonitor sa Bajo de Masinloc nga naglangkob sa siyam ka barko sa PLAN ug 14 ka barko sa CCG. Samtang sa 18 ka barko ang nakit-an sa Ayungin Shoal ug siyam ka barko sa China ang na-monitor sa palibot sa Escoda Shoal, lakip ang upat ka barko sa PLAN ug lima ka barko sa CCG.
Photo Courtesy:PNA
