Gipahibalo sa Department of Education (DepEd) nga ang “National Simultaneous Safety Drill” sa mga eskwelahan sa tibuok nasud nga una nang gi-postpone ipahigayon na karong umaabot nga Huwebes, Septyembre 3.
Gipahayag sa DepEd niadtong Martes, Septyembre 1, nga ang pag-usab sa schedule sa drill gihimo human sa konsultasyon uban sa Philippine Psychiatric Association (PPA), Philippine Society for Child and Adolescent Psychiatry (PSCAP), ug Philippine Pediatric Society (PPS) aron masiguro nga ang mga safety protocol nagsunod sa prinsipyo nga “Do No Harm” (dili makahatag og kadaot).
Dugang pa ni DepEd Secretary Sonny Angara, gikinahanglan nga mohimo og mga pagpangandam ang mga eskwelahan nga moapil sa dili pa ang drill. Lakip niini nga mga pagpangandam ang pagbansay-bansay (capacity-building training) alang sa mga magtutudlo ug oryentasyon alang sa mga estudyante nga haom sa ilang edad.
Aron masiguro ang sikolohikal nga kaandam ug malikayan ang bisan unsang kakurat o kalisang, gimando usab sa DepEd nga kinahanglang pahibaloan daan sa mga eskwelahan ang mga estudyante, ginikanan, ug mga kawani. Dugang pa, gikinahanglan nga makakuha ang mga eskwelahan og sinulat nga pagtugot gikan sa mga ginikanan ug pag-uyon gikan sa mga estudyante sa dili pa ipahigayon ang drill.
Ang mga estudyante nga giila nga nagkinahanglan og dugang nga proteksyon, o kadtong kansang mga ginikanan mihangyo og espesyal nga mga kahikayan (accommodations), kinahanglang hatagan og luwas ug alternatibong mga kalihokan nga walay silot o diskriminasyon.
Samtang, hugot nga gidili sa DepEd ang mga elemento sa drill nga sobra ka tinuod tan-awon o makapahadlok sama sa mga simulation sa hulga, mga tawo nga mag-role-play isip mga agresor, paggamit og mga hinagiban nga hait, simulation sa mga buto sa pusil, o pagpakita sa mga samad.
Aron mapadayon ang kalmado ug lig-on nga kahimtang, ang mga gitudlo nga guidance personnel ug school health officers kinahanglang mohatag og Psychological First Aid (PFA) ug mga sesyon sa debriefing human sa drill.
Gimando usab sa DepEd nga magtukod ang mga eskwelahan og klaro nga mga mekanismo sa referral nga naglambigit sa DepEd Schools Division Office (SDO), mga local government unit (LGU), ug mga pasilidad sa panglawas alang sa mga estudyante nga adunay espesyal nga panginahanglan.
Photo Courtesy: Journal News Online
