Nakighinabi na si Cagayan de Oro City Mayor Rolando “Klarex” Uy kang COCPO City Director PCol Dexter Paje kabahin sa nagpadayong problema sa mga menor de edad nga ginaklasipikar isip mga “rugby boys” sa dakbayan.
Matud ni Mayor Uy, usa kini sa mga problema nga lisod sulbaron tungod kay mga menor de edad ang kasagarang malambigit.
Giingon sa mayor nga bisan madakpan o madala sa otoridad ang mga bata, dali ra gihapon silang makagawas tungod sa ilang edad ug sa mga balaod nga nagpanalipod sa mga menor de edad.
Apan, gipasalig sa Mayor nga dili pasagdan sa city government ang problema ug padayon silang mangita og mas epektibong pamaagi aron matabangan ang mga kabataan ug malikayan ang ilang pagbalik sa kadalanan.
Gilauman usab nga mapalig-on pa ang koordinasyon sa kapolisan ug uban pang concerned agencies aron matubag dili lamang ang problema sa rugby, kundili ang kahimtang ug panginahanglan sa mga kabataang nalambigit niini.
Lambigit nga balita, giklaro sa Police Station 1 sa Divisoria nga dili rugby boy ang suspek nga giingong nanumbag sa usa ka pasahero sulod sa Patag Liner niadtong alas-6 sa buntag, Agosto 31, sa Pabayo-Fernandez Street, Barangay 3, Cagayan de Oro City.
Matud ni PMAJ Byron-John Orquillas Ratunil, Station Commander sa PS-1 COCPO, ang suspek usa ka laaw ug giila nga Children in Conflict with the Law o CICL.
Base sa inisyal nga imbestigasyon sa kapulisan, magkaila ra ang suspek ug ang biktima. Giingon usab nga dili interesado ang biktima nga mopasaka og kaso batok sa CICL.
Sa pagkakaron, gitugyan na ang laaw ngadto sa Local Social Welfare and Development Office o LSWDO alang sa hustong pag-atiman ug angay nga aksyon.
