Gipunting sa Youth and Student Sector, ilawom sa National Anti-Poverty Commission (NAPC), nga dili lamang isipon nga beneficiaries ang mga kabataan, estudyante ug mga bata, kondili hatagan usab og aktibong papel sa mga panaghisgot ug proseso sa paghimo og mga solusyon sa mga isyu nga direktang nakaapekto kanila.
Sumala kang ni Khyle Sabellano, council member representing youth and student sa NAPC nga kinahanglan mahatagan og higayon ang kabatan-onan nga maapil sa mga diskusyon bahin sa violence prevention, ilabi na human sa sunod-sunod nga shooting incidents nga naglambigit sa mga kabataan.
Gipasiugda niya nga dili angay isipon nga isolated case lamang ang mga insidente sa pagpamusil tungod kay dugay na kining problema nga nagakahitabo sa katilingban.
Gikuwestiyon usab ni Sabellano ang kakulang sa epektibong mekanismo aron mapugngan ang susamang mga insidente. Matud niya, gikinahanglan ang holistic approach sa pag-atubang sa problema imbes nga mag-focus lamang sa nahitabo human sa usa ka insidente.
Lakip sa mga angay susihon ang paagi kung giunsa pag-access sa usa ka bata ang armas, ang mga hinungdan sa violent behavior, ug ang palibot diin nagdako ang bata.
Gipasiugda ni Sabellano nga dili angay dayon isipon nga ang usa ka bata natawo nga bayolente, kinahanglang susihon ang mga kahimtang ug social factors nga mahimong nakaimpluwensya sa iyang pamatasan.
Apil usab sa iyang gipunting ang papel sa katilingban sa pagpalambo o pag-enable sa violent environment, nga nagkinahanglan og mas lawom nga assessment aron mahibal-an kung giunsa pag-abot sa usa ka bata o kabatan-onan sa ingon nga sitwasyon.
Alang kang Sabellano, kinahanglan dili lamang ang insidente ang tutokan, kondili apil ang mga hinungdan ug ang mga lakang nga mahimong himuon aron mapugngan ang pagbalik sa susamang panghitabo.
