Giawhag sa Department of Health (DOH) ang publiko nga magsul-ob og N95 face mask ug limitahan ang mga kalihukan sa gawas tungod sa haze gikan sa forest fires sa Kalimantan, Indonesia, nga nakaabot na sa pipila ka bahin sa Luzon ug Visayas dala sa habagat.
Gipasidan-an sa DOH nga ang haze adunay gagmayng partikulo sa aso, abog ug abo nga mahimong makapahinabo og kalisod sa pagginhawa, pag-ubo, pagsakit sa dughan, pangatol ug pagluha sa mga mata.
Mahimo usab kining makapasamot sa mga sakit sa baga sama sa asthma, busa gikinahanglan ang dugang pag-amping sa mga bata, senior citizens ug adunay daan nang sakit sa baga o kasingkasing.
Gitambagan ang mga apektadong komunidad nga magpabilin sulod sa balay kutob sa mahimo, sirad-an ang mga bintana ug pultahan, ug mag-amping sa pagmaneho kon limitado ang panan-aw tungod sa haze.
Kung mogawas, girekomenda ang pagsul-ob og N95 mask. Kung walay N95, mahimong temporaryong gamiton ang basa nga panyo o panapton, lakip ang pag-double mask aron makatabang pagpakunhod sa masuyop nga mga partikulo.
Gipahinumdoman usab sa DOH ang publiko nga bantayan ang kalidad sa hangin sa ilang lugar ug unahon ang kaluwasan, samtang mahimong tawagan ang National Emergency Hotline 911 alang sa dinaliang medical assistance.
Photo Courtesy: The Spectator
