Nakatala ang lalawigan sa Bukidnon og ₱162.34 bilyones nga farm output, nga maoy pinakataas taliwala sa tanang probinsya sa tibuok nasod base sa datos nga gipagawas sa Provincial Government.
Kini nga balita gipaambit ni Gobernador Rogelio Roque atol sa pagsaulog sa ika-112 nga founding anniversary sa probinsya, diin gipasabot nga dako ang naambag sa Bukidnon sa kinatibuk-ang ₱2.42 trilyones nga agricultural output sa Pilipinas.
Apan giangkon sa gobernador nga bisan pa sa dako nga produksiyon, dili kini pormal nga nagpasabot nga ang maong kantidad sa kuwarta nagpabilin ra usab sulod sa lalawigan. Dako nga bahin sa agricultural production sa Bukidnon naggikan sa mga dagkong plantasyon sa saging ug pinya, diin ang mga kompanya nga nagdumala niini adunay mga head office ug nag-unang operasyon sa gawas sa probinsya.
Sama usab sa sugarcane industry, makadawat man og kita ang mga lokal nga mag-uuma gikan sa ilang ani, apan ang uban nga mga dakong kompanya nga nalambigit niini nakabase gihapon sa gawas sa Bukidnon.
Tungod niini, gipasabot ni Roque nga ang taas nga farm output dili dayon diretso nga mabati sa lebel sa kuwarta nga nag-circulate sa lokal nga ekonomiya sa probinsya
Photo Courtesy:Governor Rogelio Roque
