Mingsaka ngadto sa hapit tulo ka milyon ang naitalang same-day visits sa lalawigan sa Bukidnon niadtong 2025 gikan sa 1.9 milyon lamang niadtong 2024, sumala sa pinakabag-ong datos gikan sa Provincial Tourism Office.
Gibutyag ni Arthur Czar Quisado, Administrative Aide III sa maong buhatan, nga miabot sa kapin 2.5 hangtod halos 2.8 milyon ang mga bisita nga misulod sa probinsya sulod lang sa usa ka adlaw, nga nagpakita og dakong paglambo sa sektor sa turismo kumpara sa miaging tuig.
Nakita usab ang dakong kalamboan sa pondo ug kita sa sikat nga Kaamulan Festival, diin gikan sa ₱86 milyon nga sales record niadtong 2024, mitaas kini ngadto sa ₱133.1 milyon niadtong 2025. Bisan pa man nga usa kini sa mga lig-ong timailhan sa pagdaghan sa mga bisita, gipadayag ni Quisado nga kinahanglan gihapon kining tan-awon nga dunay pag-amping tungod kay ang pagsaka sa presyo sa mga palaliton ug ang inflation mahimo usab nga nakatampo sa maong kantidad.
Tungod sa maong positibong resulta, naglaum ang Provincial Tourism Office nga mapadayon ang pagtaas sa ihap sa mga turista karong tuiga bisan taliwala sa mga hagit sama sa fuel crisis. Gipasalig sa ahensya nga padayon nilang imonitor ang mga tourist arrivals ug uban pang kalingawan aron masiguro ug masukod ang tiunay nga kahimtang sa turismo sa tibuok Bukidnon
Photo Courtesy: Bukidnon Provincial Tourism Office
