Gisaulog sa probinsya sa Bukidnon ang ilang ika-112 nga founding anniversary karong adlawa, Setyembre 1, 2026. Ubos sa temang “112 Years of Resilience: Standing Firm, Moving Forward as a Unified Bukidnon”.
Gisugdan ang selebrasyon sa ala 6:00 sa buntag pinaagi sa usa ka Social-Civic Parade of Colors ug Flag Raising Ceremony, samtang giandaman usab og gabiing kalingawan nga pagataposon sa usa ka 20-minutos nga grand fireworks display.
Pangunang highlight sa gabiing kalingawan mao ang libreng full-length concert sa sikat nga OPM icon nga si Ely Buendia, nga ipahigayon alas 7:00 sa gabii sa Centennial Stage nga nahimutang sa Capitol Grounds. Bisan pa man nga bukas sa tanang publiko ang maong concert, gipadayag sa organizing committee nga adunay giandam nga direktang VIP ug safety area para sa mga opisyal ug mga dinapit nga bisita aron masiguro ang hapsay ug luwas nga dagan sa okasyon.
Sumala kang Events Committee Chairperson Mr. Cornelia “Jun” Milan Cruz II, kabahin lamang kini sa mga nakahan-ay nga kalingawan sa lalawigan diin una nang gipahigayon ang nagkadaiyang dula sa sports sama sa Basketball Tournament, Pickleball, Governor’s Cup Softball, ug ang Bukidnon Moto Festival aron sa pagpalig-on sa panaghiusa sa tibuok probinsya.
Photo Courtesy: LGU – Bukidnon
