Gipahibalo sa Department of Agriculture (DA) ang pagtukod sa Interim Rice Industry Development Office, nga nailhan usab isip Rice Office, aron mapalig-on ang koordinasyon, pagmonitor ug pagpatuman sa mga programa alang sa industriya sa humay sa nasud.
Pinasikad sa Department Order No. 26, ang Rice Office maoy manguna sa pagpatuman sa mga programa ubos sa National Rice Program ug Rice Competitiveness Enhancement Fund (RCEF), sa nasyonal ug lokal nga lebel.
Sumala sa DA, ang industriya sa humay nag-atubang gihapon og daghang hagit, lakip ang taas nga gasto sa produksiyon, kakulang sa post-harvest facilities ug panginahanglan sa mga pamaagi sa pagpanguma nga mas andam sa epekto sa pagbag-o sa klima.
Gipasabot sa ahensya nga gikinahanglan ang usa ka opisina nga espesipikong motutok sa pagpalambo sa industriya sa humay aron mas mapokus ang pagdumala sa sektor ug mas episyente nga matuman ang mga tumong sa departamento.
Pinaagi sa bag-ong Rice Office, gilauman nga mas mapalig-on ang pagpatuman ug pagmonitor sa mga programa sa humay, lakip ang mga inisyatiba nga gitumong sa pagpalambo sa produksyon ug kompetisyon sa mga lokal nga mag-uuma.
Photo Courtesy: Shutterstock
