Patay ang 21-anyos nga babaye human kini gipusil sa usa ka sundalo sa Purok 7, Kilometer 8, Barangay Ampayon, Butuan City, pasado alas 6 sa kagabii, Agosto 30, 2026. Ang biktima giila nga si Leah Mae Gallino Badbaran, 21 anyos, usa ka laundry attendant ug residente sa Agusan del Sur.
Ang suspek giila nga si Noel “Akit” Manpinsahan, usa ka miyembro sa Armed Forces of the Philippines (AFP), ug ulahing na-assign sa 26th Infantry Battalion Philippine Army sa Talacogon, Agusan del Sur.
Base sa impormasyon nga nahipos sa News Team, namilo ang biktima sa mga labada sulod sa usa ka laundry shop sa dihang kalit nga miabot ang suspek sakay sa motorsiklo. Matud pa, naninghag ang suspek sa biktima ug nangutana kung tinuod ba nga makigbulag na kini kaniya. Giingong armado ang suspek niadtong higayona.
Nigawas pa ang biktima sa laundry shop, apan kalit siyang gipusil sa suspek ug naigo sa dughan. Human sa pagpamusil, Daling misibat ang suspek padulong sa wala matino nga direksyon. Gidala dayon ang biktima sa Butuan Medical Center alang sa pag-atiman, apan wala na kini makaabot nga buhi ug gideklarar nga dead on arrival.
Samtang nagpadayon usab ang imbestigasyon sa kapulisan aron matino ang tinuod nga motibo sa pagpamusil ug ang eksaktong mga sirkumstansiya sa insidente. Ang maong panghitabo matawag nga crime of passion, Giingong krimen nga may kalabotan sa panagbangi sa relasyon.
Sa pagkakaron, nagpadayon ang hot pursuit operation sa Butuan City Police Station 4 batok sa suspek. Nakig-coordinate na usab ang kapulisan sa mga kasikbit nga police station aron masubay ug madakpan ang suspek nga mikalagiw.
Photo Courtesy:Junel Ivan Llanos Fediles
