Gikonsidera karon sa Malacañang ang posibilidad nga ipatuman ang pagdili sa paggamit sa Facebook sa tibuok nasod, human sa rekomendasyon nga gisugyot sa Cybercrime Investigation and Coordination Center (CICC).
Matod ni Palace Press Officer Claire Castro, dili kini dali nga ipatuman tungod kay kinahanglan pa kining masusi ug matun-an pag-ayo aron matimbang ang tanang posibleng epekto niini.
Matod niya, usa sa mga angay tan-awon mao ang paggamit sa social media sa pagpakatap sa mga bakak nga impormasyon o fake news, lakip na sa ubang sulod nga mahimong makadaot sa publiko.
Gidugang usab ni Castro nga bukas si President Ferdinand R. Marcos Jr. sa posibilidad nga idili ang mga gaming app ug uban pang aplikasyon nga mahimong makadaot sa interes ug kaayohan sa nasod.
Labina kon adunay negatibong epekto kini sa kinabuhi ug kaugmaon sa mga kabatan-onan. Bisan pa niini, klaro nga kinahanglan pa og mas lawom nga pagtuon ang gobyerno sa maong mga rekomendasyon sa dili pa mohimo og pinal nga desisyon.
Photo Courtesy: Philippine News Agency
