Balhog sa prisohan ang 43-anyos nga Estonian national ug retiradong sundalo, nga giila sa alyas “Oliver,” human kini nadapakn sa kapulisan sa Dapa, Surigao del Norte, dihang nagmaoy kini ug ming sukol pa sa pulis nga ning responde.
Gidakop ang maong langyaw alas 9:30 sa gabii niadtong milabay nga adlaw sa Barangay Union, Dapa, Siargao Island, Surigao del Norte, gumikan sa kasong Malicious Mischief ug paglapas sa Article 151 – Resistance and Disobedience to a Person in Authority or the Agents of Such Person.
Subay sa imbestigasyon, nakadawat og sumbong ang kapulisan gikan sa usa ka concerned citizen bahin sa suspek nga giingong hubog ug nagmugna og kagubot sa iyang gi-abangang boarding house.
Giingong gipangguba sa suspek ang mga bintana sa boarding house nga gipanag-iya ni Emilita Abansado Ravelo. Pag-abot sa mga pulis aron pakalmahon siya, misukol hinuon ang suspek sa mga otoridad, hinungdan nga gilayon siyang gidakop.
Sa pagkakaron, anaa na sa kustodiya sa Dapa MPS ang suspek alang sa tukmang dokumentasyon ug legal nga disposisyon.
