Gihatagan og espesyal nga pag-ila sa Lokal nga Panggamhanan sa San Fernando ang 89th Infantry (Makatao) Battalion tungod sa ilang dakong kontribusyon sa pagmintinar sa kalinaw ug seguridad sa lungsod atol sa usa ka seremonya nga gipahigayon sa Municipal Compound, Barangay Halapitan, Bukidnon kaniadtong nakalabay nga adlaw.
Pormal nga gipadayag ni Mayor Rogelio Yeke ang iyang dakong pasalamat sa 89IB nga nahimong yawe aron makuha sa lungsod ang status nga “insurgency-free,” diin iyang gipasiugda nga ang maong kalinaw nagbukas og mga oportunidad sa paglambo sa ekonomiya, panginabuhian, ug komunidad sa mga residente ug mga Lumad. Samtang gipadayag usab ni Lieutenant Colonel Antonio G. Bulao I, Commanding Officer sa 89IB, ang iyang dakong pasalamat sa maong dungog nga ilang gihulagway nga makahuluganon kaayo isip una nga pag-ila sa ilang yunit sa siyam ka tuig nga pagserbisyo, hilabina sa ilang pagpangandam sa bag-ong assignment.
Gitataw ni Lt. Col. Bulao nga ang pagpreserbar sa kalinaw maoy hiniusang responsibilidad sa gobyerno, militar, ug tibuok komunidad aron mapanalipdan ang mga sakripisyo ug kalampusan nga nakab-ot sa San Fernando.
Photo courtesy: LGU – San Fernando
