Gipadayag ni Police Lieutenant Colonel Ariel Philip Pontillas, Officer-in-Charge (OIC) sa Malaybalay City Police Station, nga nagpabilin ang iyang pagtutok sa pagpreserbar sa kalinaw ug kahapsay sa dakbayan samtang naghulat pa sa opisyal nga pagpili sa lokal nga panggamhanan alang sa sunod nga Chief of Police.
Gipatin-aw ni Pontillas nga subay sa probisyon sa balaod, awtomatikong molingkod isip OIC ang Deputy Provincial Director for Operations samtang wala pa’y pormal nga matudlo nga bag-ong hepe sa kapulisan. Base sa iyang assessment, nagpabilin nga ubos ang lebel sa kriminalidad sa Malaybalay, lakip na ang index ug non-index crimes, ug wala usab siyay nakitang dagkong hagit sa mga focus crimes sama sa murder ug rape.
Apan gipunting sa OIC nga usa sa mga pangunang hagit karon sa dakbayan mao ang nagpadayong insidente sa vehicular accidents sa kadalanan nga nagkinahanglan ug hugot nga pagtagad. Tungod niini, gipahayag ni Pontillas nga ang iyang tumong mao ang pagpadayon sa mga maayong programa ug polisiya sa kalinaw ug kaayohan nga nasugdan na sa mga nag-unang hepe ug sa lokal nga panggamhanan.
Photo courtesy: Malaybalay Police Station
