IRING NGA WALAY REPRODUCTIVE ORGANS, UNANG NATALA SA UK

‎Unang natala sa nasud UK ang usa ka talagsaong iring sa United Kingdom ang posibleng maoy unang natalang iring nga nabuhi nga walay reproductive organs o mga organo alang sa pagpadaghan.
‎
‎Giila ang maong iring nga si Beans, nga kaniadto gitawag og Hope, usa ka tabby-and-white nga kuting nga gidala ngadto sa Cats Protection centre sa Warrington sa edad nga 15 ka semana uban sa uban pang iring nga gibiyaan.
‎
‎Sa sinugdan, nagtuo ang mga kawani nga babaye ang maong iring. Apan sa dihang gisusi kini sa beterinaryo, ilang nadiskubrehan nga wala kini’y external genitals.
‎
‎Sa dugang nga eksaminasyon, napamatud-an usab nga wala kini’y internal reproductive organs. Sumala ni Fiona Brockbank, kanhing senior field veterinary officer sa Cats Protection, ang talagsaong kondisyon sa maong mananap, gitawag og sexual organ agenesis, diin mapakyas sa pagtubo ang maong mga organo atol sa sayong yugto sa paglambo sa embryo.
‎
‎Bisan sa talagsaon nga kahimtang, giingong himsog, malipayon ug aktibo si Beans. Gihatagan usab kini og maayong prognosis sa mga beterinaryo alang sa taas ug normal nga kinabuhi.
‎
‎Daghang tawo gikan sa nagkalain-laing bahin sa United Kingdom ug bisan gikan sa California sa Estados Unidos ang nagpahayag og interes sa pag-ampon niini. Sa kataposan, nakakaplag si Beans og permanente nga balay human kini gi-ampon sa usa ka estudyante nga ginganlag Jessi Bennett.
‎
‎Photo Courtesy: Smithsonian Magazine