Gipahigayon karong adlawa ang World Café of Opportunities (WCO) cum National Tech-Voc Day sa TESDA, Agosto 26, 2026 sa VJR Arriesgado Auditorium, National Highway, Brgy. Visayan Village, Tagum City, Davao del Norte.
Kini kabahin sa ika-32 nga anibersaryo sa TESDA nga nagpasiugda sa WCO, usa ka kalihokan nga nagdugtong sa mga TESDA graduates ug jobseekers ngadto sa mga kompanya ug industry partners aron makakita sila og mga oportunidad sa trabaho.
Dungan karon nga gipahigayon sa upat (4) ka probinsya sa Davao del Norte, Davao de Oro, Davao del Sur ug Davao Occidental ang nasangpit nga kalihukan nga gitambungan sa mga nag-unang opisyales ug lideres sa matag lalawigan.
Gisugdan kini isip Job Linkaging and Networking Services (JoLiNS), ug nahimong kabahin sa mga kalihokan sa TESDA anniversary ug National Tech-Voc Day.
Mipartisipar sa maong kalihukan ang nagkadaiyang ahensya sa gobyerno, sama sa DOLE, SSS, Philhealth, PAG-IBIG, PSA, Association of Technical Institute of North Davao Inc. (ATINDI) lakip na ang Provincial Government, City Government of Tagum, ug ang Overseas Workers Welfare Administration (OWWA).
