Nadakpan ang tulo ka suspek sa managlahing insidente sa pagpangawat sa Dakbayan sa Sugbo, human sa paspas nga aksyon sa mga lumulupyo, barangay security personnel ug mga tig-atiman sa establisemento.
Sa Barangay Basak San Nicolas, nadakpan sa usa ka Barangay Public Safety Officer (BPSO) ang suspek nga giingong nangawat og manok pangsabong nga nagkantidad og ₱6,000. Sa Barangay Lahug, nadakpan sa caretaker ang 34-anyos nga lalaki nga giingong nagputol og 30 metros nga kable sa kuryente ug nangolekta og mga puthaw nga scrap.
Samtang, sa Barangay Tisa, gidakop ang 32-anyos nga suspek nga giingong nangawat og mga gamit nga mokabat sa ₱13,000. Gidala ang mga suspek sa tagsa-tagsa nilang estasyon sa kapulisan alang sa hustong dokumentasyon ug proseso.
Gidayeg ni Police Colonel Ricky C. Sumalde, acting city director sa Cebu City Police Office (CCPO), ang mga lumulupyo ug barangay personnel tungod sa ilang pagkaalerto ug dali nga paglihok. Giawhag niya ang publiko nga magtinabangay sa kapulisan ug ireport dayon ang mga kadudahang kalihokan aron mapadayon ang kalinaw ug kaluwasan sa dakbayan.
Photo Courtesy: PNP Cebu City Police Office
