Nangita og tukmang lugar si Cebu Governor Pamela Baricuatro nga kapuy-an sa mga pamilya sa mga pasyente sa Vicente Sotto Memorial Medical Center (VSMMC), imbes nga matulog sila sa kilid sa dalan sa gawas sa ospital.
Matud ni Baricuatro, aduna nay natumbok nga lugar apan wala pa kini magamit. Aduna usab silay interim plan alang sa dinaliang panginahanglan ug dugayng solusyon aron matabangan ang mga pamilyang nagbantay sa ilang mga minahal.
Bisan national government hospital ang VSMMC ubos sa Department of Health (DOH), gihingusgan sa gobernadora nga angay usab motabang ang mga lokal nga kagamhanan, ilabi na nga daghang pasyente ug pamilya ang gikan sa nagkalainlaing lugar sa rehiyon.
Isip tsirman sa Regional Development Council 7, isaka ni Baricuatro ang isyu aron magtinabangay ang DOH, VSMMC, Cebu City ug ubang lokal nga kagamhanan sa pagpangita og dinalian ug dugayng solusyon.
Photo Courtesy: The Freeman
