Naghatag og livelihood assistance ang Department of Social Welfare and Development (DSWD) Field Office X ngadto sa mga pundok sa Bukidnon pinaagi sa Peace and Development Buong Bansa Mapayapa (PDBBM) Program.
Ang maong inisyatibo nagtumong sa paghatag og kinahanglanong puhonan aron makasugod sila og kaugalingong negosyo ug makatabang sa pagpalambo sa ekonomiya ug seguridad sa lokal nga komunidad.
Atol sa turnover ceremony nga gipahigayon sa Valencia City, Bukidnon niadtong Agusto 24, 2026, nakadawat og Livelihood SEED Capital Fund ang 12 ka People’s Organizations (POs). Ang matag kapunongan gihatagan og ₱300,000 nga seed capital aron magamit sa pagtukod, pagpadagan, ug pagpalapad sa ilang napiling mga micro-enterprises nga mohaom sa ilang panginahanglan sa komunidad.
Aron masiguro ang kalampusan ug kalamboan sa maong mga proyekto, ang DSWD-10 kauban ang ilang mga kapares nga ahensya magpadayon sa paghatag og regular nga monitoring ug capacity-building assistance. Pinaagi niini, gilauman nga mahimong malahutayong tinubdan sa kita ang maong mga negosyo alang sa kaayohan sa mga benepisyaryo ug sa tibuok rehiyon
Photo Courtesy: DSWD – Northern Mindanao
