Gipahamtang sa gobyerno sa Canada ang “counter-tariffs” nga moabot sa 50% alang sa mokabat C$28 bilyong kantidad sa mga produkto gikan sa United States. Ang maong lakang gihimo isip tubag sa bag-ong mga buwis nga gipahamtang ni US President Donald Trump sa mga produktong gikan sa Canada.
Sumala kang Finance Minister François-Philippe Champagne, epektibo ang bag-ong buhis karong Setyembre 8 sa mga produktong sama sa bakal, muwebles, ug protective gears sa mga trabahante ug lokal nga negosyo sa ilang nasud.
Mitumaw ang maong tensyon human hingpit nabungkag ang mga negosasyon sa kalakalan tali sa duha ka nasud diin nagbinayloay og akusasyon ang matag pikas bahin sa dili makatarunganon nga mga hangyo. Ingonman, naggahin usab ang gobyerno sa Canada og C$7.5 bilyong suportang pampinansyal alang sa ilang mga lokal nga industriya aron malikayan ang kadakong pagkawala og trabaho samtang nagpadayon ang trade war.
Luyo sa gipagawas nga pamahayag sa White House ug ni Trump nga ang Canada ang nagpakita og dili makatarunganong posisyon sa storya, giakusahan usab ni Canadian Prime Minister Mark Carney ang US nga tuyong gipaningkamutan nga gub-on ang mga nag-unang industriya sa Canada.
Photo Courtesy: Fraser Institute
