Miabot na sa nasud ang ikatulong 8-car Electric Multiple Unit (EMU) trainset gikan sa Japan kagahapong adlawa, Agosto 25, 2026, para sa Malolos-Tutuban segment sa North-South Commuter Railway (NSCR).
Ang maong tren gipailalom sa proseso sa pag-import sa Bureau of Customs (BOC) ug gikatakdang dad-on sa Malanday Depot sa Valenzuela City. Gipahibalo ni Transportation Secretary Banoy Lopez nga ang pagtukod sa 147-kilometros nga NSCR system nga adunay 35 ka estasyon gipaspasan na aron magkonektar sa Central Luzon, Metro Manila, ug Calabarzon.
Gipasalig sa Department of Transportation (DOTr) nga ang tanang trainset nakaagi sa strict inspection aron masiguro ang seguridad ug kalidad niini sa dili pa opisyal nga gamiton sa publiko. Target sa DOTr nga masugdan ang partial operations para sa rutang Valenzuela paingon sa Malolos, Bulacan sa ika-4 nga kwarter sa tuig 2027.
Kung hingpit nang mag-operate ang tibuok NSCR system, gilauman nga makaserbisyo kini og gibanabanang 800,000 ka pasahero matag adlaw. Dugang pa niini, mapamubo sa maong pasilidad ang oras sa pagbiyahe gikan sa Clark, Pampanga paingon sa Calamba, Laguna ngadto na lang sa duha ka oras gikan sa kasamtangang upat ka oras nga biyahe.
Photo Courtesy: DOTR
