Mokabat sa 46 ka indibidwal ang nahulog sa kamot sa kapolisan human sa gipahigayong 40 ka sunod-sunod nga operasyon batok sa ilegal nga droga sa tibuok lalawigan sa Bukidnon sulod lamang sa bulan sa Agosto 2026.
Sumala sa datos nga gipagawas ni PCPT Shiela Joy Jangad, spokesperson sa Bukidnon Police Provincial Office (BPPO), nga mas gipahugtan pa sa kapolisan ang ilang kampanya aron magpabilin ang kaangayan ug kalinaw sa komunidad.
Sa maong mga pagpangronda, nakumpiska sa mga awtoridad ang 553.33 gramos nga marijuana ug 130.32 gramos nga shabu nga adunay kinatibuk-ang standard drug price nga nagkantidad og ₱952,597.36
Gipahayag ni Jangad nga padayon ang ilang pag-monitor ug paglusad og mga buy-bust operation sa nagkalain-laing lungsod ug dakbayan batok sa mga nalambigit sa pagbaligya ug paggamit sa maong gidiling nga drogas.
Gipahimangnoan sa BPPO ang publiko nga ang krisis sa ilegal nga droga dili lang usa ka usapin sa pamatasan o balaod, kon dili usa ka dakong hulga nga makaguba sa kinabuhi sa pamilya ug sa kaluwasan sa tibuok nga katilingban. Subay niini, nanawagan sila sa suporta sa mga residente nga padayon nga makig-alayon sa kapolisan aron masumpo ang maong mga ilegal nga aktibidad sa Bukidnon
Photo Courtesy: BUKPPO
