Mipagawas og Executive Order No. 093, Series of 2026 si City Mayor Amie G. Galario nga nagpasuspenso sa tanang face-to-face classes sa tanang lebel sa pampubliko ug pribadong tunghaan sa Valencia City sugod Agosto 24, 2026 hangtod sa dugang pahibalo.
Gihimo ang maong desisyon alang sa kaluwasan sa mga estudyante ug magtutudlo samtang gipahigayon ang imbestigasyon bahin sa nadawat nga mga hulga batok sa mga eskwelahan. Aron dili mabalda ang pagtungha, gimandoan ang tanang eskwelahan nga mobalhin una sa modular distance learning o uban pang alternative learning modalities.
Sa kasamtangan, anaa na sa kustodiya sa kapulisan ang giilang batan-on nga naghimo sa maong online threat human sa gipahigayong search and location operation. Mipasalig si City Spokesperson Jun Galario nga gimandoan na sa Mayor ang City Social Welfare and Development Office (CSWDO) aron mahatagan og saktong intervention ug pag-atiman ang maong batan-on.
Kauban ang 31 ka barangay ug nagkalain-laing ahensya, gipahugtan na sa lokal nga kagamhanan ang seguridad sa palibot sa mga tunghaan, samtang gipahimangnoan ang publiko nga magmatngon ug mosalig lamang sa mga opisyal nga pahibalo
Photo Courtesy: LGU Valencia City
