Misaka ang ihap sa mga pasahero sa Cebu Pacific niadtong buwan sa Hulyo diin misaka og 4.7 porsyento ang passenger traffic tungod sa kusog nga domestic travel nga nakabawi sa pagkunhod sa international passengers.
Sumala sa Cebu Pacific nga nakadala kini og 2.2M nga pasahero niadtong Hulyo, mas taas kun itandi sa 2.1 milyon sa samang bulan niaging tuig. Tungod niini, miabot sa 16.72M ang total nga pasahero sa unang pito ka bulan sa tuig, o 4.3 porsyentong mas taas.
Sa Hulyo, misaka og 9.1% ang domestic passengers ngadto sa 1.73 milyon, samtang mikunhod og 8.6% ang international passengers ngadto sa 485,000. Ang pagkunhod sa international traffic kabahin sa giplanong pagpaubos sa kapasidad sa mga international flights.
Sumala sa kompanya, gipalig-on sa kusog nga domestic demand ang ilang operasyon bisan pa sa hinay nga travel season. Misaka usab og 15.3% ang domestic seat capacity kun itandi sa samang panahon niaging tuig.
Sa umaabot nga Oktubre, ipadayon pag-usab sa Cebu Pacific ang pipila ka ruta sa Asya, lakip ang Cebu-Ho Chi Minh, Cebu-Shanghai, Cebu-Nagoya, Clark-Hanoi ug Manila-Xiamen aron mapalapdan ang koneksyon ug makahatag og mas barato nga mga kapilian sa mga biyahedor.
Photo courtesy: Travel Weekly Asia
