Patay ang usa ka regional-level most wanted person human kini misukol sa kapulisan atol sa operasyon sa pagpatuman sa warrant of arrest sa Purok Roxas, Barangay Concepcion, Koronadal City, South Cotabato, Nobyembre 13, 2026. Giila ang namatay nga si alyas “Bangus,” nga adunay giisyu nga warrant of arrest tungod sa mga kasong murder ug attempted murder.
Base sa report sa Koronadal City Police Station, nakit-an sa operatiba sa CIDG-12 ang suspek atol sa ilang intelligence operation. Apan sa dihang duolon na unta ug dakpon, mibunot kini og kalibre .45 nga pistola nga gisuksok sa iyang hawak.
Misukol ang suspek pinaagi sa armas hinungdan nga gipusil siya sa operatiba ug natumba. Gidala dayon siya sa ospital apan gideklarang dead on arrival sa attending physician.
Naangol usab sa maong insidente ang kauban sa suspek nga si alyas Boboy, 20 anyos, residente sa Barangay San Jose, General Santos City, human maigo sa bala sa likod. Nakaangkon siya og samad pinusilan ug padayon nga gitambalan sa Allah Valley Medical Specialist Center.
Dugang pa, si alyas Bangus top 3 sa listahan sa mga most wanted person sa regional level sa Region 12 ug top 1 sa provincial level sa Sarangani Province.
Nagpadayon ang pagproseso sa crime scene sa kapulisan aron makuha ang dugang ebidensya kalabot sa maong insidente.










