Patay ang usa ka 65-anyos nga babaye human gipusil didto sa Sitio Sicanan, Barangay Latabon, Siocon, Zamboanga del Norte, pasado alas-7:30 sa kagabhion niadtong nakalabay nga adlaw. Gikumpirma sa Siocon Municipal Police Station ang maong insidente, diin ang biktima residente sa Barangay Pangian, sa nasangpit nga lungsod.
Base sa inisyal nga imbestigasyon sa kapulisan, miadto ang biktima sa balay sa suspek aron maningil sa utang. Samtang gihisgutan nila ang bayranan, nasuko matud pa ang asawa sa suspek ug gikuwestiyon nganong naningil ang biktima atubangan sa iyang bana. Misangpot kini sa mainitong panaglalis sa magtiayon kalabot sa wala pagpahibalo sa maong utang.
Pipila ka minuto human niini, nananghid na unta ang biktima nga mobiya ug mopauli, apan gipahulat siya sa suspek. Gikatahong mikuha dayon og armas ang suspek ug gipusil ang biktima hinungdan sa hinanaling kamatayon niini.
Human sa insidente, gilunsad dayon sa mga personahe sa Siocon MPS, sa pakigtambayayong sa 2nd Zamboanga del Norte Provincial Mobile Force Company, ang pursuit, checkpoint ug dragnet operations aron madakpan ang suspetsado.
Sa kasamtangan padayon pa ang lawom nga imbestigasyon ug operasyon sa kapulisan aron matino ang tinuod nga hinungdan sa pagpamusil ug ang pagsikop sa suspetsado.
𝐏𝐡𝐨𝐭𝐨 𝐂𝐨𝐮𝐫𝐭𝐞𝐬𝐲: 𝐒𝐢𝐨𝐜𝐨𝐧 𝐌𝐮𝐧𝐢𝐜𝐢𝐩𝐚𝐥 𝐏𝐨𝐥𝐢𝐜𝐞 𝐒𝐭𝐚𝐭𝐢𝐨𝐧










