Nagplano nga palapdan sa Cebu City Sports Commission (CCSC) ang ilang collegiate basketball tournament sa sunod nga edisyon human sa malampusong pagpahigayon sa 2nd Cebu City Collegiate Invitational Basketball Tournament sa Cebu City Sports Institute.
Matod ni CCSC Chairman Dr. Rhoel Dejano, tumong sa komisyon nga makadani og dugang nga mga koponan, lakip ang mga grupo gikan sa Manila.
Misalmot sa usa ka semana nga torneyo ang University of the East Red Warriors ug reigning FilOil EcoOil Preseason Cup champion Jose Rizal University Heavy Bombers, uban sa tulo ka grupo sa mga sugbuanon ang University of the Visayas Green Lancers, University of Cebu Webmasters ug Benedicto College Cheetahs.
Sumala ni Dejano, malampuson ang torneyo tungod kay nakahatag kini og higayon sa mga Sugbuanon nga makigsangka batok sa lain-laing sistema ug lebel sa kompetisyon gikan sa Manila.
Tungod sa positibong resulta sa torneyo, gitan-aw na sa CCSC ang pagdugang sa mga grupo nga musalmot sa sunod tuig aron mas mapalig-on ang collegiate basketball competition sa Cebu City.
Photo courtesy: Cebu Daily News
