Gikondena ni Cabinet Secretary Benjamin “Benhur” Abalos Jr. ang giingong dili maayong pamatasan sa Norwegian nga proponent sa 50-megawatt AI data center nga planong tukoron sa Oton, Iloilo, human kini mibiya sa public consultation ug giingong nanginsulto sa mga lokal nga reporter.
Misupak ang mga residente sa Barangay Abilay Sur sa proyekto atol sa public consultation niadtong Biyernes, ilabina sa posibleng epekto niini sa ilang suplay sa tubig.
Nasuko ug mibiya sa venue si data center developer Daniel Stefan Robertsen human sa mainit nga diskusyon sa mga residente, samtang nakita usab sa usa ka video nga iyang giinsulto ug gipangbalikas ang mga lokal nga reporter nga nag-cover sa kalihokan.
Giingon ni Abalos nga “deplorable” ang gibuhat ni Robertsen ug gipasiugda nga ang mga langyaw nga nagnegosyo o nagtrabaho sa Pilipinas kinahanglan motahod sa mga Pilipino ug mosunod sa mga balaod sa nasud.
Gipahinumdoman usab sa opisyal nga dili angay bastuson o insultuhon ang mga Pilipino, ilabi na sulod mismo sa ilang kaugalingong nasud.
Photo Courtesy: Wikipedia
