Isip pagtuman sa iyang saad sa transparency ug pagserbisyo publiko, gipagawas ni Malaybalay City Councilor Jason Chad Ayala sa publiko ang iyang opisyal nga payslip alang sa buwan sa Agusto 2026, diin iyang gipadayag nga ang tibuok niyang limpyong sweldo nga mikabat sa ₱97,550.98 hingpit nga iuli ug ipang-apud-apod isip hinabang sa mga molupyo sa dakbayan.
Subay sa opisyal nga dokumento gikan sa City Government of Malaybalay, ang gross pay sa konsehal miabot sa kinatibuk-ang ₱135,643.00—nga gilangkoban sa basic salary (₱116,643.00), PERA (₱2,000.00), Representation Allowance (₱8,500.00), ug Transportation Allowance (₱8,500.00)
Apan human sa ₱38,092.02 nga mandatory deductions sama sa withholding tax ug mga bayranan sa GSIS, PhilHealth, Pag-IBIG, ug CGMEA, ang nahibilin nga net pay gigahin alang sa medical assistance, funeral aid, ug suporta sa kabarangayan, tunghaan, ug simbahan.
Gipunting sa Konsehal nga ang maong lakang dili pagpasiatab kon dili usa ka pagpamatuod nga ang gahum ug suweldo naggikan sa katawhan, busa angay lamang kini nga ibalik ngadto sab sa katawhan.
Photo Courtesy: Jason Chad Ayala
