Mikunhod ngadto sa 6.8 porsyento ang headline inflation rate sa Bukidnon niadtong bulan sa Hulyo 2026, diin mas ubos kini og 1.8 percentage points kumpara sa 8.6 porsyento nga natala niadtong Hunyo. Bisan pa sa maong paghinay sa pagtaas sa presyo sa mga palaliton, mas taas gihapon kini kon itandi sa -0.8 porsyento nga inflation rate sa probinsya niadtong Hulyo 2025, base sa opisyal nga datos nga gipagawas sa Philippine Statistics Authority (PSA-Bukidnon).
Gipakita usab sa report sa PSA-Bukidnon nga ang 6.8 porsyento nga inflation sa probinsya mas taas kumpara sa average nga inflation rate sa tibuok Northern Mindanao nga anaa sa 6.4 porsyento, ingon man sa national headline inflation sa nasud nga natala sa 6.2 porsyento.
Samtang, ang year-to-date inflation sa Bukidnon gikan Enero hangtod Hulyo 2026 nagpabilin sa average nga 6.3 porsyento kumpara sa susamang panahon sa miaging tuig.
Gipresentar ang maong datus sa PSA-Bukidnon atol sa ilang gipahigayon nga Inflation Report Press Conference sa Malaybalay City kagahapon Agosto 13, 2026.
Sa maong tigum, gipunting ug gipasabot sa ahensya ang mga nag-unang commodity groups ug mga prayoridad nga serbisyo nga dakong nakatampo sa pagbag-o ug paglihok sa presyo sa probinsya niaging tibuok Hulyo.
Photo Courtesy: PSA – Bukidnon
