Nakaplagang patay ang usa ka 54-anyos nga lalaki sulod sa usa ka irrigation canal sa Purok Rang-ay, Barangay Dagat-Kidavao, Valencia City niadtong Hapon sa Agosto 12, 2026.
Gikumpirma sa Valencia City Police Station nga nakadawat sila og tawag bahin sa naglutaw nga lawas sa kanal pasado alas-1:35 sa hapon, diin sa pag-abot sa duty investigator, nakit-an ang biktima nga nag-atubang na sa langit sa kilid nga bahin sa maong patubig.
Base sa inisyal nga imbestigasyon sa kapolisan, katapusan nga nakitang buhi ang biktima sa iyang live-in partner niadtong Agosto 11 sa ilang balay.
Una kining nakit-an sa usa ka 43-anyos nga residente nga nakamatikod sa lawas nga naglutaw sa tubig, samtang nakumpirma usab sa pamilya nga ang biktima adunay daan nga medical condition nga epilepsy o tora-tora.
Walay nakita usab ang mga awtoridad og bisan unsang timailhan sa foul play o pisikal nga pakigbisog diha sa lawas sa biktima, diin gituohang pagkalumos tungod sa posibleng pag-atake sa iyang sakit ang pangunang gitan-aw nga rason sa iyang kamatayon.
Gidala na ang patayng lawas sa Lao-as Funeral Homes alang sa preparasyon sa paglubong, samtang padayon pang gisuta sa kapolisan ang tibuok sirkumstansya sa maong insidente.
Photo Courtesy:Valencia City Police Station
