Nanawagan ang Department of Foreign Affairs (DFA) sa gobyerno sa China nga seguruhon ang kahimtang, kaluwasan, ug katungod sa labaw sa 100 ka mga Pilipino nga giaresto didto sa maong nasud tungod sa alegasyon sa ilegal nga pagtrabaho ug pagpuyo.
Gipamatud-an sa DFA ang maong dakong pagpang-aresto human mismo ang Chinese Foreign Ministry nagpahibalo sa ilang gipahigayon nga operasyon, diin gipadayag sa DFA nga samtang giprespeto sa Pilipinas ang kapasilidad sa China sa pagpatuman sa ilang immigration laws, kinahanglan gihapon kining sundon subay sa gilatid nga due process.
Subay sa Vienna Convention on Consular Relations ug sa 2013 Philippines-China Consular Agreement, gihangyo sa DFA ang mga awtoridad sa China nga ipahibalo dayon sa Philippine Foreign Service Posts ang detalye sa pagkadetener sa maong mga pinoy. Sa kasamtangan, nakig-alayon na ang DFA sa Philippine Embassy sa Beijing ug mga Consulate-General sa China aron matino ang eksaktong gidaghanon sa mga nadakpan, masusi ang mga rason sa pagkakulong, ug masiguro nga nasunod ang legal ug consular procedures.
Samtang, gisaway ni Defense Secretary Gilbert Teodoro ang gihimo nga pagpang-aresto sa China batok sa mga Pilipino. Giinsistir sa kalihim nga ang maong lakang usa ka porma sa “blackmail” ug iyang gikondena ang giingong paggamit sa mga Pilipino isip paagi aron makialam sa proseso sa pagpatuman sa balaod sulod mismo sa nasud sa Pilipinas
Photo Courtesy: DFA Bukidnon
