Usa ka imbentor nga si Christian Poincheval ang nagviral sa social media human nga nakahimo og talagsaon nga kapsula nga giingong makatabang sa pag-usab sa baho sa utot aron mahimong mas humot, sama sa tsokolate o mga bulak.
Ang produkto gihimo gamit ang nagkalain-laing natural nga sangkap sama sa activated charcoal, fennel, algae, cranberry ug cocoa. Giingong ang ideya mitumaw human siya makasinati og dili maayo nga baho sa iyang utot atol sa usa ka panagtapok uban sa mga higala.
Tungod niini, iyang gihimo ang produkto isip usa ka talagsaon nga solusyon sa problema sa baho sa utot. Dugang pa ni Poincheval nga makatabang ang maong kapsula aron nga dili muburot ang tiyan sa usa ka tawo. Gani, daghan usab ang nalingaw sa maong ideya, samtang ang uban nahimong interesado.
Ang maong istorya nagpahinumdom usab nga ang inobasyon dili limitado sa dagkong teknolohiya, tungod kay usahay ang praktikal ug ordinaryong problema maoy mahimong sinugdanan sa usa ka talagsaon nga ideya nga makadani sa interes sa kadaghanan.
Photo Courtesy:The Feedski
