Gikumpirmar sa pinakabag-ong impormasyon nga namatay na ang drayber nga giila lamang sa alyas nga “Jongjong,” human malambigit sa aksidente diin ang iyang gimanehong dump truck mibangga sa terrace sa usa ka balay sa Barangay Balabag, Digos City.
Base sa inisyal nga imbestigasyon, gikan pa sa pag-spray sa mga kahoy nga mangga ang maong sakyanan sa dihang giingong napakyas ang preno, hinungdan nga wala na kini makontrol ug miigo sa maong panimalay.
Dako ang kadaot nga naangkon sa unahang bahin sa dump truck ug sa terrace sa balay. Sa unang report, gidala pa ang drayber sa ospital tungod sa mga samad nga iyang naangkon, apan sa ulahi gikumpirmar nga wala na kini makaangkon pa og kinabuhi.
Samtang, wala nay laing residente nga naangol sa insidente ug nagpadayon ang imbestigasyon sa mga awtoridad aron matino ang tinuod nga hinungdan sa nahitabo.
