Temporaryong gitangtang sa Apple ang messaging application nga Telegram gikan sa App Store human matumbok nga adunay sulod nga naglapas sa polisiya sa kompanya batok sa child sexual abuse material (CSAM). Natangtang ang app sa iPhone ug iPad App Store niadtong Lunes apan dali usab kining naibalik.
Sumala sa Apple, ang ilang imbestigasyon nakadiskubre og sulod nga supak sa ilang mga lagda. Human niini, gilayon sa Telegram ang pagtangtang sa maong content ug gibabagan ang account sa user nga responsable niini, hinungdan nga nabalik usab ang app sa App Store.
Samtang, giingon sa Telegram sa usa ka pahayag sa social media nga dili tinuod ang mga balitang nagpasabot nga mawagtang na ang ilang serbisyo.
Sa laing bahin, nagpadayon usab ang Telegram sa pag-atubang og mga isyu sa ubang nasod, lakip ang kaso sa Australia kabahin sa giingong kapakyasan sa pagtangtang sa mga content nga may kalabutan sa terorismo ug ang paglakip sa Russia sa founder ug CEO niini nga si Pavel Durov sa ilang listahan sa mga giila nga terorista ug ekstremista.
Photo courtesy: Britannica
