Mihakot ang Lapu-Lapu Arnis de Abanico Team og 13 ka bulawang medalya, lima ka silver ug duha ka bronze sa unang duha ka adlaw sa kompetisyon sa 18th World Eskrima Kali Arnis Federation (WEKAF) World Championships nga gihimo sa Talkatora Indoor Stadium sa New Delhi, India.
Lakip sa nakahatag og mga bulawang medalya alang sa Team Lapu-Lapu sila Jamaica Jane R. Vasquez, Jack Noah T. Abatayo, Clarence Y. Prado, Nicollete L. Ybañez, Mike Jorie T. Israel, Kurt Imbert T. Limbaga, James Clay Beltran ug Saturnino V. Gestopa IV. Nakuha usab sa grupo ang bulawang medalya sa Team Demonstration (Anyo).
Samtang nakakuha og mga silver nga medalya sila Saturnino V. Gestopa IV, Jannalyn N. Ycoy, Kim U. Buenviaje, Avegaile S. Alpanta, Shamler C. Augusto ug Kate Iccy E. Solis. Ang mga tumbaga nga medalya usab nasakmit nila Clarence Y. Prado ug Juny S. Putot.
Nagpakita ang maong kalampusan sa lig-on nga representasyon sa dakbayan sa Lapu-Lapu sa internasyonal nga torneo sa eskrima, kali ug arnis.
Photo courtesy: Lapu-Lapu City Police Information Office
