Gipahibalo sa Department of Agriculture (DA) nga wala kini’y plano nga magpatuman og temporaryong import ban sa bugas bisan pa sa nagkaduol nga panahon sa pag-ani sa humay ug sa gilaumang epekto sa El Niño sa ulahing bahin sa tuig.
Matod ni Agriculture Secretary Francisco Tiu Laurel Jr., importante nga mapadayon ang igo nga suplay sa bugas aron maandam ang panginahanglan sa nasud hangtod sa sunod tuig. Sa pagkakaron, miabot na sa 3.3 milyones ka metric tons ang imported nga bugas sa Pilipinas.
Bisan pa sa padayon nga importasyon, nagpasalig ang DA nga adunay mga lakang aron mapanalipdan ang mga lokal nga mag-uuma. Lakip niini ang pagpalit sa National Food Authority (NFA) og hangtod 500,000 metric tons nga lokal nga humay ug ang pagdugang sa pondo alang sa procurement ngadto sa ₱20 bilyon karong 2026.
Ubos sa programa, paliton sa NFA ang basa nga humay sa ₱21 matag kilo, samtang ang uga nga humay paliton sa ₱25 hangtod ₱27 matag kilo.
Gimando usab sa DA ang pagpagawas sa daan apan maayong kalidad nga bugas gikan sa mga bodega sa NFA aron mahatagan og luna ang bag-ong ani ug mapadayon ang programa sa gobyerno nga nagbaligya og ₱20 matag kilo nga bugas.
Photo Courtesy: Philippine Information Agency
