Gisugyot sa Department of Finance (DOF) ang pagpatuman og mas taas nga excise tax sa soft drinks, vape, plastik, alkohol, ug uban pang tobacco products aron mabawi ang gilaumang moubos nga kita sa gobyerno tungod sa giplanong tax relief alang sa mga Pilipino ug gagmayng negosyo.
Ubos sa ProGRESS o Promoting Growth, Revenue, and Equity towards Socio-Economic Sustainability, plano sa gobyerno nga ipataas ang income tax exemption gikan sa ₱250,000 ngadto sa ₱350,000 matag tuig ug dili na usab patawan og minimum corporate income tax ang mga micro ug small enterprises.
Sumala sa DOF, kapin 3.13 milyon ka taxpayers ug 78,000 ka gagmayng negosyo ang gilaumang makabenepisyo sa maong tax relief. Apan, gibanabana sa ahensya nga moabot sa ₱67 bilyon ang mawagtang nga kita sa gobyerno tungod niini.
Aron mabawi ang maong kantidad, gilauman sa DOF nga ang mga gisugyot nga bag-ong buhis makahatag og kapin ₱518 bilyon nga kita gikan sa 2027 hangtod 2030, nga mas dako pa kaysa gibanabanang revenue loss.
Naglaom usab ang DOF nga mapasar ang maong mga panukala sulod ning tuiga human sa serye sa mga konsultasyon uban sa nagkalain-laing sektor.
