Gipasalig ni Presidente Ferdinand Marcos Jr. ang Kongreso nga mapasar sa dili pa matapos ang 2026 ang gisugyot nga Promoting Growth and Resilient Economic Stability through Tax Reform (ProGRESS) bill. Tumong sa maong panukala ang paghatag ug tax relief sa mga empleyadong adunay tinuig nga kita nga P350,000 paubos, samtang magpataw usab ug mas taas nga buhis sa mga luxury vehicles ug uban pang produkto.
Sumala sa Malacañang, padayon pang gi-review sa Department of Finance (DOF) ang maong panukala aron masiguro nga andam kini alang sa pagpasar sa Kongreso. Gilauman sa DOF nga makatigom ang gobyerno ug P518.71 bilyon nga dugang kita gikan sa 2027 hangtod 2030, samtang mokabat sa P326.92 bilyon ang tax relief nga mahatag sa publiko.
Ubos sa maong panukala, mosaka gikan sa P250,000 ngadto sa P350,000 ang income nga dili na sakop sa income tax matag tuig. Ang mga empleyadong kwalipikado mahimong makatipid ug hangtod P15,000 kada tuig, samtang ang adunay mas taas nga kita makabenepisyo usab sa ubos nga income tax rates.
Lakip usab sa gisugyot nga reporma ang pag-exempt sa micro ug small businesses sa Minimum Corporate Income Tax (MCIT) aron maminusan ang ilang gasto ug mapalig-on ang ilang operasyon.
Aron mabawi ang posibleng mawagtang nga kita sa gobyerno tungod sa tax relief, gisugyot sa DOF ang pagpataas sa buhis sa mga ilimnong tam-is, single-use plastics, vape ug e-cigarettes, alkohol, road user fees, ingon man ang pagpataw ug mas taas nga excise tax sa mga luxury vehicles nga nagkantidad ug kapin sa P8 milyon, lakip ang private jets.
Matud pa sa Malacañang, dili direktang mabug-atan ang kadaghanan sa ordinaryong Pilipino sa maong mga bag-ong buhis, tungod kay naka-focus kini sa mga luxury items ug mga produktong adunay negatibong epekto sa panglawas, sama sa tam-is nga ilimnon ug vape.
Ang ProGRESS tax reform bill usa sa mga prayoridad nga programa sa administrasyon aron mapalig-on ang koleksiyon sa gobyerno, makahatag ug dugang pondo alang sa mga serbisyo publiko, ug sa samang higayon makahatag ug tax relief sa milyon-milyong Pilipinong empleyado.
Photo Courtesy: Philippine News Agency
