Nakakuha og ONE Championship contract ang Pinay Muay Thai fighter nga si Islay Erika Bomogao sa Baguio City human sa impresibong kadaugan pinaagi sa knockout batok kang Klinphaka Por Thaisong sa Bangkok.
Sa unang round, naglisod si Bomogao sa taas nga mga sipa sa iyang kaatbang, apan nakabawi siya sa ikaduhang round pinaagi sa sunod-sunod nga kusganong mga siko.
Pag-abot sa ikatulong round, gibuhian niya ang usa ka kusog nga tuo nga suntok nga nakapukan dayon sa Thai fighter. Mihunong ang away 13 ka segundo pa lang sa maong round ug gideklarang mananaog ang Filipina.
Tungod sa iyang kadaugan, nakadawat si Bomogao og $100,000 nga kontrata sa ONE Championship ug dugang nga performance bonus.
Sa maong kadaugan, nagpabiling walay kapildihan ang rekord ni Bomogao sa 5-0, ug mas naila pa siya sa internasyonal nga entablado sa Muay Thai.
Photo Courtesy: Sports Bytes Philippines
