Gipasalamatan sa Provincial Government of Bukidnon ang walo ka provincial hospitals ug ang Provincial Economic Enterprise Development and Management Office (PEEDMO) human nakab-ot ang ₱1.073-billion nga income collection sa tuig niaging 2025.
Atol sa Monthly Convocation Program kagahapon Agosto 3, 2026 sa Kaamulan Open Theater, gipahalipayan ang maong mga institusyon tungod sa ilang dakong kontribusyon nga nakapahimo sa Bukidnon nga usa sa mga probinsya nga adunay pinakataas nga locally sourced income.
Base sa report nga gipresentar ni Atty. Roger L. Ligdo, Department Head sa PIASO ug OIC sa PEEDMO, mas taas ang maong koleksyon kumpara sa ₱810-million nga nakalap niadtong tuig 2024. Sa kinatibuk-ang ₱1.073-billion nga kita, ang dakong bahin nga ₱744-million (69%) naggikan sa PhilHealth, ₱296-million (28%) gikan sa Department of Health, ug ang nahabilin nga ₱32-million (3%) gikan sa mga over-the-counter nga koleksyon.
Pinaagi sa mensahe ni Provincial Governor Rogelio Neil P. Roque nga gipadayag ni 4th District Board Member Jose Ranulfo Pepito Jr., gidayeg sa gobernador ang dedikasyon ug sakripisyo sa mga kawani sa ospital ug PEEDMO alang sa dekalidad nga serbisyo sa panglawas. Ang walo ka ospital—nga naglakip sa Bukidnon Provincial Medical Center ug mga BPH sa Malitbog, Talakag, Manolo Fortich, Maramag, Kalilangan, Kibawe, ug San Fernando—padayon usab nga mopaambit sa ilang suporta samtang sila nagsubli sa kasaulogan sa Hospital Week sugod Agosto 3 hangtod 12, 2026
Photo Courtesy: LGU Bukidnon
