Gilauman nga magpadayon ug mokusog pa ang kondisyon sa El Niño hangtod sa unang bahin sa 2027.
Kini ang gipahimangno sa PAGASA Malaybalay atol sa Kapihan Media Forum, ang padayong pag-init sa temperatura sa dagat sa sentral ug sidlakang bahin sa Pasipiko nakatuman na sa mga sukdanan alang sa El Niño, samtang ang mga timailhan sa atmospera nagpakita usab sa mas daghang pag-ulan sa sentral ug sidlakang Pasipiko ug mas uga nga kahimtang sa kasadpang Pasipiko, lakip na ang Pilipinas.
Matud ni Engr. Ybonne Mae Gabales-Pedreza, Chief Meteorological Officer sa PAGASA Malaybalay, adunay taas nga posibilidad nga mahimong Strong El Niño ang kahimtang tali sa Hulyo ug Setyembre.
Gilauman usab nga mosulod kini sa Very Strong El Niño gikan Oktubre hangtod Disyembre, diin ang nagkadaiyang climate models sa internasyonal nga meteorological agencies nagpakita og hangtod 81 porsyento nga posibilidad nga mahitabo kini.
Tungod niini, gidasig ang publiko, ilabina ang mga mag-uuma ug mga lokal nga pangagamhanan, nga padayon nga subayon ang mga weather ug climate advisories aron maandam sa posibleng epekto sa nagpalig-ong El Niño, lakip na ang mubo nga pag-ulan, hulaw, ug kakulang sa suplay sa tubig sa ubang lugar.
