Magpahigayon pag-usab ang National Food Authority (NFA) og re-auction sa 741,570 ka sako sa lokal nga milled rice nga kapin na sa unom ka bulan ang edad, human mapakyas ang unang subasta niadtong Hunyo 30 tungod kay walay mitambong nga bidders.
Ang maong mga stock sa bugas nga gitipigan sa nagkalain-laing bodega sa NFA sa tibuok nasud adunay kinatibuk-ang kantidad nga kapin ₱1.068 bilyon. Sumala kang NFA Administrator Larry Lacson, re-auction lamang kini tungod kay wala gayoy niapil sa unang bidding.
Ang pre-auction conference ipahigayon sa Agosto 5, samtang ang pag-abli sa mga bid himuon sa Agosto 12. Gitugotan usab ang mga interesadong bidders nga susihon ang mga rice stocks gikan Agosto 5 hangtod Agosto 10, atol sa regular nga oras sa trabaho.
Ang subasta bukas alang sa mga organisasyon sa mag-uuma, kooperatiba, mga grupo, ug lehitimong mga negosyo. Kinahanglan usab nga mobayad ang mga interesado og auction bond nga katumbas sa labing menos 10 porsyento sa kantidad sa ilang bid matag lote.
Photo Courtesy: NFA
