Nakaangkon sa upat ka samad dinunggaban ang 50-anyos nga lalaki sa niaging gabii, didto sa may Sitio New Kibawe, Barangay Little Baguio San Fernando, Bukidnon.
Sumala sa taho, nag-inom ang biktima ug ang 45-anyos nga suspek sa usa ka tindahan dihang nagkalalis tungod sa kabag-ohan sa ilang panag-estorya human ubos na sa impluwensya sa ilimnong makahubog nga misangpot pagdunggab sa biktima sa upat ka higayon diin miresulta kini og grabeng samad sa nagkadaiyang parte sa kalawasan.
Dali nga gidala sa mga Barangay Tanod ang biktima ngadto sa Bukidnon Provincial Hospital sa San Fernando kinsa pabiling pang gitambalan.
Ang maong panghitabo girespondihan gilayon sa mga kapaulisan sa San Fernando MPS ubos sa pagdumala ni PCPT Gregorio M. Daguno, OIC, aron magpahigayon og imbestigasyon.
Sa karon, padayon pa ang hot pursuit operation sa mga pulis batok sa suspek nga misibat bibit ang gigamit nga kutsilyo pagkahuman sa maong insidente.
Photo Courtesy: San Fernando MPS
