Nabalaka karon ang United Nations (UN) migration agency tungod sa pagdaghan sa mga tawo nga nailad ug napugos sa pagtrabaho sa mga scam compound o online fraud centers sa pipila ka bahin sa Asya.
Matod sa International Organization for Migration (IOM), libo-libong tawo gikan sa kapin 80 ka nasod ang giingong madala sa mga operasyon human mailad pinaagi sa peke nga job advertisements sa social media nga nagpasaad og taas nga sweldo ug maayong trabaho. Ang pipila sa pinakadakong scam compound makita sa Myanmar, Cambodia, ug Laos, diin gibanabana nga moabot sa 300,000 ka mga trabahante ang gigamit sa paghimo og online scams batok sa mga biktima, lakip na ang mga tigulang nga indibidwal sa mga nasod sa Kasadpan.
Apan sumala sa IOM, daghan usab sa mga trabahante ang biktima mismo sa human trafficking. Sa ilang pag-abot sa mga lugar, giingong kuhaon ang ilang mga dokumento ug pugson sila sa pagpanglimbong online pinaagi sa hulga ug pagpang-abuso. Dugang pa, ang mga biktima makasinati usab og pagpangdaot, trauma, ug dagkong utang bisan human sila maluwas. Tungod niini, nanawagan ang IOM sa mga gobyerno sa Asya nga palig-onon ang ilang mga lakang batok sa mga sindikato nga nagdumala niini nga mga ilegal nga operasyon.
Photo courtesy: East Leigh Voice
