Gipasang-at na sa Kamara ang usa ka balaudnon nga nagtumong nga dili na pasagdan nga mobayad og minimum corporate income tax (MCIT) ang mga domestic corporation sugod sa 2027.
Giduso kini nilang House Speaker Faustino Dy ug House Majority Leader Sandro Marcos. Ang House Bill (HB) No. 10346 gisumiter subay sa panawagan ni Presidente Bongbong Marcos Jr. sa iyang ikalimang State of the Nation Address (SONA) alang sa tax relief nga makatabang sa mga negosyo.
Matod ni Marcos, ang balaudnon nagtumong sa pag-amendar sa Section 27 sa National Internal Revenue Code. Iyang gipasabot nga ang pagtangtang sa MCIT maghatag og mas dakong kahigayunan sa mga negosyo nga mapadayon ang ilang mga empleyado, mabayran ang sweldo, ug makapamuhunan pa alang sa ilang pagtubo. Ubos sa kasamtangang balaod, ang domestic corporation kasagarang mobayad og MCIT nga katumbas sa 2 porsyento sa gross income sugod sa ikaupat nga tuig sa operasyon kung mas taas kini kaysa regular corporate income tax.
Ubos sa gisugyot nga balaod, ang 2 porsyentong MCIT ipatuman na lamang hangtod Disyembre 31, 2026, ug sugod Enero 1, 2027, ang mga sakop nga korporasyon mobayad na lang og regular corporate income tax base sa ilang taxable income.
Ang regular corporate income tax kasagarang 25 porsyento, samtang ang kwalipikadong domestic corporation nga adunay net taxable income nga dili molapas og P5 milyon ug total asset nga dili molapas og P100 milyon mahimong mapasakop sa 20 porsyentong buhis. Gitugotan usab sa panukala nga ang sobra nga MCIT nga nabayran daan, mahimong i-carry forward ug ma-credit batok sa regular corporate income tax sulod sa tulo ka sunod-sunod nga tuig.
Kung mahimong balaod kini, magpagawas ang Department of Finance (DOF) og implementing rules sulod sa 90 ka adlaw gikan sa rekomendasyon sa BIR commissioner, ug mahimong epektibo ang balaod 15 ka adlaw human kini mapatik.
Photo courtesy: Philippine News Agency
