Giklaro sa Roads and Traffic Administration (RTA) nga ang pagdili sa mga Provincial Public Utility Vehicles sa pagsulod sa sentrong bahin sa Cagayan de Oro City, kabahin sa pagpatuman sa balaod ug sa paningkamot nga mapagaan ang grabeng trapiko sa dakbayan.
Matud ni RTA Acting Assistant Department Manager Doy Ramiro, ang lakang mitumaw human sa panawagan sa lokal nga transport groups nga naapektuhan sa kompetensya sa mga provincial PUV nga nagagawas-sulod sa siyudad aron mamasahero.
Gipasabot usab ni Ramiro nga sugod pa lamang niadtong Hulyo 28 ang information dissemination, busa wala pa sila nag-isyu og citation tickets. Hinuon, namatikdan nga kadaghanan sa mga operators ug drivers gikan sa Misamis Oriental ug mga silingang probinsya mituman na sa bag-ong patakaran.
Lambigit nga balita, nagpahayag og suporta ang United Drivers Association (UNIDA) sa gipatuman sa lokal nga panggamhanan sa Cagayan de Oro City nga pagtalana sa mga rota sa mga provincial puv nga mosulod sa syudad.
Matud ni UNIDA President Joel Gabatan, nakasabot ang ilang grupo sa lakang tungod kay tumong niini nga mapahapsay ang dagan sa trapiko ug malikayan ang pagsamot sa pagsinabtanay sa kadalanan.
Dugang niya, positibo ang epekto sa paglimita sa mga sakyanan gikan sa Talakag nga hangtod na lamang sa SM City Uptown, ingon man sa mga sakyanan gikan sa Alae, Manolo Fortich nga taman na lamang sa Puerto, Cagayan de Oro City.
Matud pa ni Gabatan, mas gaan na karon ang dagan sa trapiko sa pipila ka mga lugar sa syudad tungod sa polisiya. Gilauman usab nga pinaagi sa kooperasyon sa mga transport groups ug sa LGU, mas mahimong organisado ug episyente ang transportasyon alang sa kaayohan sa tanang mga pasahero ug mga motorista.
Photo Courtesy:LTO Philippines
