Boluntaryong misurender ang usa ka kanhing Secretary sa nabungkag na nga North Eastern Mindanao Regional Committee (NEMRC) sa Communist Terrorist Group (CTG), nga nagpakita sa padayon nga kalampusan sa kampanya sa gobyerno alang sa kalinaw ug kaluwasan sa Caraga Region.
Ang misurender mao si Elena Estaniel Rambuyon, nailhan usab sa alyas nga “Sandara,” 56 anyos. Misurender siya ngadto sa mga tropa sa 3rd Special Forces Battalion sa Philippine Army ubos sa 401st Infantry Brigade, uban sa suporta sa Philippine National Police (PNP), niadtong Hulyo 24 sa Lianga, Surigao del Sur.
Matud ni 401st Infantry Brigade Commander Brig. Gen. Benjamin Leander, dugay nang naglie-low si Rambuyon sukad pa niadtong Nobyembre 2025. Iyang usab gipasabot nga ang padayon nga operasyon sa militar nakapugong sa lihok ug operasyon sa nahibiling mga miyembro sa CTG, nga maoy usa sa mga hinungdan sa iyang boluntaryong pagsurender.
Samtang, giingon usab ni 4th Infantry Division Commander Maj. Gen. Marion Angcao nga ang pagsurender ni Rambuyon dugang pamatuod nga malampuson nang nabungkag ang NEMRC. Matud pa niya, nagpalig-on usab kini sa deklarasyon sa gobyerno nga ang Caraga adunay Stable Internal Peace and Security.
Gipasalig sa militar nga ipadayon nila ang pagpalig-on sa kalinaw pinaagi sa hugot nga panagtinabangay sa mga lokal nga panggamhanan, nagkadaiyang ahensya sa gobyerno, ug sa mga komunidad aron mapadayon ang malinawon ug luwas nga kahimtang sa rehiyon.
Photo courtesy: 401st Infantry Brigade
