Gipusil patay ang usa ka 33-anyos nga mekaniko nga giila lamang sa alyas “Gelo” ala 1:30 sa kadlawon niadtong Hulyo 28, 2026 sa Purok 6, Lower Apokon, Tagum City. Dali nga miresponde ang mga kapulisan human makadawat og report gikan sa Central 911 Davao Base bahin sa nahitabong pagpamusil.
Sumala sa inahan sa biktima, natulog siya sa ilang balay sa dihang adunay wala mailhing tawo nga mitawag sa iyang anak. Pag-abli sa biktima sa pultahan, kalit nga nadungog ang tulo ka sunod-sunod nga buto sa pusil.
Sa pagsusi, iyang nakita ang biktima nga nagbuy-od duol sa pultahan nga adunay daghang samad pinusilan, samtang nakasibat ang wala mailhing suspek.
Mihimo og crime scene processing ang Davao del Norte Provincial Forensic Unit (DNPFU) ug nakarekober og tulo ka basiyo sa bala ug usa ka deformed fired bullet nga gituohang gikan sa kalibre .45, usa ka improvised tooter, usa ka sachet nga adunay gidudahang shabu, tulo ka kwintas, usa ka silver nga relo, ug 13 pesos nga kwarta.
Gidala ang lawas sa biktima sa Rubio Memorial Services alang sa hustong pag-atiman ug autopsy. Padayon pa ang imbestigasyon sa kapulisan, diin gitan-aw ang personal grudge isip usa sa posibleng motibo sa krimen.
Samtang, gimando ni Acting Chief of Police PLTCOL Edgardo G. Bahan ang pagpatuman sa dragnet operation ug pakigkoordinar sa ubang estasyon sa kapulisan aron masuta ug madakpan ang responsable sa maong pagpamusil.
Photo Courtesy: Tagum PNP
